وهبدأ ان شاء الله بتعريف
باسماك السيكلد الافريقي وهذكر اسماء العائلات والبحيرات اللى بينتمى ليها الاسماك
..
وبعدين ازاى تجهز الحوض المناسب للاسماك من ناحية الحجم المناسب والتجهيزات
الداخلية والفلاتر والديكورات و حتى اعداد الاسماك وطرق الحفاظ على صحة الاسماك والوقاية
من الامراض ونوعية الغذاء المناسب و بعد كده التفريخ ..
اولا: تقسيم الاسماك من حيث البحيرات والانهار والعائلات
المنتمية ليهم اغلب الانواع:
زى ما احنا عارفين ان السيكلد الافريقي من اجمل اسماك
المياه العذبة وده يرجع لتنوع الاشكال والالوان الكتيرة جدا ليه وطبعا الموطن
الاصلى بحيرات وانهار افريقيا ...
السيكلد الافريقي انواعه كتيرة جدا جدا وموطنه الاصلى بحيرات افريقيا العظمى ...
واشهر ثلاث بحيرات فى افريقيا بحيرة ملاوى وبحيرة تنجانيكا
ويجى بعدهم بحيرة فيكتوريا وبعدهم انهار وسط افريقيا
 |
| وهنا خريطة توضح الثلاث بحيرات الكبري فى افريقيا والتى يتفرع منها اغلب انواع السيكلد الافريقي الموجودة حاليا |
انواع وعائلات السيكلد الافريقي :
وتنقسم جميع انواع السيكلد الافريقي فى جميع البحيرات
الى عائلات .. طبعا كل عائلة منهم بيبقى ليه شكل وطبع مميز فى العموم ... واشهر
العائلات دى (الموبونا – الهاب – بيكوك – التروفيوس – وفيه عائلة
الدوارف سيكلد والاسماك النهرية – وفيه عائلات الهامبى هيد ... الخ )
وهنا صور توضح معلومات عن اشهر العائلات الموجودة فى بحيرة ملاوى
وهنا صور توضح معلومات عن اشهر العائلات الموجودة فى بحيرة ملاوى
 |
عائلة الموبونا - Mubuna |
 |
عائلة البيكوك او الالونوكارا - Peacock - Aulonocara |
 |
عائلة الهاب و الاوتاكا - Haplochromis - Utaka |
هنيجى دلوقت لجزء مهم جدا ..
ثانيا: ازاى تجهز الحوض لاستفبال الاسماك وماهو الحجم
المناسب للحوض :
اول حاجة لازم نعرفها ان كل اسماك السيكلد الافريقى
بيعيش فى بيئته الطبيعية فى مياه قلوية بين 7 : 9
درجة حرارة المية داخل الحوض من 24 : 27 درجة مئوية
والنسبة هنا بتختلف من بحيرة للتانية وفيه طرق طبيعية
لرفع البى اتش (قلوية المياه) .. زى مثلا
اضافة جرش او قطع المرجان بداخل الفلاتر او السامب او استخدام الاصداف والصخور
البحرية بداخل الحوض ودى كلها طرق طبيعية .. اما الطرق الكيميائية بتبقى عن طريق
بعض المركبات ممكن استخدام الملح او بعض المستحضرات المصنعة من بعض شركات ادوية المعروفة عالميا ...
و فى العموم احنا عندنا المياه بتاعتنا من الحنفية البى
اتش بتاعها عالى مبيقلش عن 6ونص وساعات بيعدى ال7 ... هنقفل الجزء ده مؤقتا
وهرجعله بعده كدا فى اجزاء تانية من الموضوع ..
الحوض المناسب لتربية السيكلد الافريقى عشان يوصل لنمو
سليم وميحصلش مشاكل لا يقل عن 100 سم ولاتقل السعة اللترية للحوض عن 250لتر ..
وفيه الحجم دا تقدر تربى من 10 ل17 سمكة مرتاحين جدا ويكونو كلهم ذكور ودا مهم
جدااا جداا ..
دا فى حالة انك عاوز تعمل حوض تقدر تربي فيه اكتر من نوع
للاستمتاع بالالون المميزة للسيكلد الافريقي
وهنا اولا : هتبدأ بفرش الحوض بنوع جرش ناعم و افضل حاجة
الرمل الابيض او السيلكا او الكوارتز .. وهضيف قطع صخور وترصهم بداخل الحوض بالشكل
اللى يعجبك ويفضل توزيع الصخور كالتلى جزء فى الوسط وممكن جزء او صخرة كبيرة على
اليمين واخرك على الشمال وكل ما زاد وكبر حجم الحوض هيبقي افضل طبعا ..
ثانيا : الفلترة لازم تكون جيدة جدا مع التغيرات
الاسبوعية لربع مية الحوض بمية مركونة او مية من الحنفية مباشرة مع استخدام مزيل
الكلور بنسبة مناسبة يعنى لا تحط زيادة ولا تحط قليل ..
افضل فلاتر تصلح للسيكلد هى الفلاتر الخارجية اما الجاهزة
او السامب الخارجى او الداخلى باقتطاع جزء من الحوض وفصله وعمل غرف للفلترة تحط
جواه الميديا واستخدام هيد رفع لسحب المية من الحوض للسامب والعكس ..
ثالثا بقى : الاضاءة مهمة جدا لاظهار الوان وجمال اسماك
السيكلد عشان تشوف الالوان للسمك زى الفيديوهات اللى بنتفرج عليها على اليوتيوب و
ع الانترنت لازم تستخدم اضاءة جيدة وتستخدم عدة اطياف مش لون واحد وطبعا الاضاءةة
الجيرلوكس من افضل انواع الاضاءة ويعيبها عدم توفرها وان اتوفرت عند بعض شركات
اللمبات المستوردة بتكون غالية .. وفى الحقيقة كل اللمبات الصينى اللى بتتباع هنا
فى مصر عند اغلب التجار مش لمبات جيرلوكس دى لمبات فلورسنت او نيون بس بتبقي ملونة
وهى بردو بتفي بالغرض لو جبت نوعية محترمة وممكن تستخدم الليدات وتنوع فى الوانهم
او اللمبات الموفرة ..
وفيه هنا ملحوظة
..
الاضاءة الزرقاء او البنفسجى بتظهر اللون الازرق والبنفسجى
والاطياف المشتقة منه
الاضاءة الزهرى الجيرلوكس بتظهر اللون البرتقالى او
البينك ودا لون داخل فى معظم اسماك السيكلد الافريقي
الاضاءة اللبيضاء ودا لون اساسى بيظهر باقى الالوان
بداخل الحوض ..
حاول على قد ما تقدر تعمل تناسق بداخل الحوض بين الالوان
والخلفية لو الاضاءة ...
لون خلفية الحوض كمان له دور كبير فى اظهار الوان
الاسماك ويفضل استخدام اللون الازرق كخلفية ..
ثالثا : طرق التغذية السليمة للحفاظ على صحة اسماكك :
الافريقي اغلب انواعه بتتغذى على الطحالب فى بيئتها
الطبيعية وفيه بعض الانواع كبيرة الحجم بتاكل الاسماك الصغيرة .. بس انت اهم حاجة
عندك عشان تحافظ على صحة والوان اسماكك انك تأكل الاسماك انواع اكل غنية بالخضروات
والطحالب وخصوصا طحلب سبيرولينا سواء كان اكل مجفف علف او بليتس او اقراص الطحالب
الجاهزة ودا ميمنعش احتياج الاسماك لبعض نسب البروتين القليلة ولكن لاتتعدى 36 او
40 % وعشان تحافظ على الوان وصحة السمك لا تكثر من الطعام دى قاعدة عامة انت بتاكل
مرتين او 3 فى اليوم بنسب معقولة بحيث ان الاسماك كلها تاكل والمفروض يوم اويومين
فى الاسبوع ياكلو اكل يشبعهم ويوم يصوموا عن الاكل خلاص دا يوم الراحة بكده انت هتقدر
تحافظ على جمال الاسماك وصحتهم باذن الله ..
انواع الاكل : ممكن تستخدم الاكل المجفف من الشركات
المعروفة زى تيترا او سيرا او هيكارى او جى بى ال او تروبيكال او داجانا او نورثفين وغيرها ودى
الانواع المتوفرة بالسوق المصرى حاليا عند التجار او عند بعض الهواى مع التأكد من صلاحية الاكل المدون على العلبة او الكيس ..
ملحوظة مهمة جميع منتجات تيترا وسيرا الموجودة فى مصر
حاليا منتهية الصلاحية وبعض التجار بيضربو تاريخ صلاحية مزور والبعض الاخر بيقول
الحقيقة ولكن انا عن نفسي بستخدم بعض انواع من شركة تيترا المخزنة بطريقة جيدة
ومفيش اى مشاكل بس بضيف عليهم مسحوق طحلب سبيرولينا او حتى لو اكلت من الاكل بدون
اضافة اى شئ لايحدث اى مشاكل ..
وبستخدم ايضا بعض منتجات داجانا وهيكارى وتروبيكال
المخصصة للسيكلد الافريقي وبعض الانواع الاخرى الغنية بالعناصر المفيدة التى تصلح للسيكلد
وجميعها جيدة ..
ملحوظة كمان : ابعد تماما عن اى نوع لاكل من شركة سيرا
موجود بالسوق المصرى لانه منتهى الصلاحية من سنين وله اضرار .. غير كدا اى نوع
تانى ممكن تاكل منه عادى ..
ممكن كمان تاكل الاسماك الجمبرى بعد تقشيره او تاكله فى
بعض الاحيان خضروات زى الخيار والكوسة ولكن متكترش يعنى هى مرة واحدة فى الاسبوع
بالكتير .. وفيه كمان ناس بتستخدم الخلطات المضاف ليها جمبرى واسماك وفيتامينات
وخضروات مع اضافة مسحوق سبيرولينا وفرم جميع المكونات وتجميدها فى الفريزر وتاكيل
الاسماك منها .. خلاصة كلامى ان اسماك
السيكلد الافريقي ممكن تاكل اى حاجة لكن عشان تحافظ على الوان السمك فيها اسباب
كتيرة وعناصر لازم تواجدها فى الاكل بصفة مستمرة زى الطحالب والفيتامينات المحفزة
للغدد .. وبكده هتضمن باذن الله الحفاظ على سمكك خالى من الامراض ..
هنيجى دلوقت لطرق التفريخ :
رابعا : التفريخ :
من اهم الحاجات اللى بتحفز على التفريخ خطوة خطوة هشرحهم بطرقة مبسطة جدا عشان الكل يستفيد ان
شاء الله :
يجب اقتناء مجموعة من نوع واحد لاتقل عن 8سمكات (مستعمرة) وتربيتهم منذ
الصغر لحين بلوغهم وبكده انت بتحافظ عليهم من الخناقات وبتديهم الراحة والفرصة
كاملة يكبروا بشكل سليم ويتعودوا على الحوض وده هيفيدك عند البلوغ وسن التفريخ ..
بعد البلوغ وظهور الذكور الاناث يجب عزل جميع الذكور وترك ذكر واحد مع الاناث وده طبعا عشان ميحصلش مضايقات للذكر والانثى لو حملت البيض ..
اغلب انواع السيكلد الافريقي بتفرخ عن طريق حمل الانثى للبيوض بالفم لحين
الفقس .. وعشان كده لازم الاناث تبقي مرتاحة داخل الحوض ويفضل الاضاء لاحواض
التفريخ تكون هادية جدا .. للحفاظ على هدوء الاسماك وهدوء وراحة الاناث الحاملة
للبيض .. لان اى ضغط مفاجئ او خوف للاسماك ممكن يؤدى لبلع الانثى للبيض ..
1) البي اتش والحفاظ علي ثبات البي اتش داخل الحوض مهم جدا لاكتمال التفريخ
بشكل صحيح باذن الله وانا ذكرت فوق طرق
ظبط البي اتش داخل الحوض ارجعلها ..
2) ثبات درجة الحرارة كمان مهم جدا وافضل درجة حرارة لتربية ةتفريخ
الافريقى متقلش عن 26 ولا تزيد عن 28 ..
3) بعد 10ايام ل3 اسابيع ممكن تاخد الصغار من
فم الام عن طريق فتح فمها وتفريغه فى علبة بلاستيك او حوض صغير وتحطلهم
فلتر سفنج وتأكلهم اى نوع اكل مطحون وبعد كدا ممكن تاكلهم دود حى ..
ارجوا يكون الموضوع رد على استفسارات كتيرة
لهواة السيكلد الافريقي
وانتظروا باذن الله موضوعات تانية جديدة